Salacor tra tant fevelâ al pues deventâ profitevul di scoltâ ancje la vôs di cui che al à la responsabilitât di custodî la memorie e il simbul dal sôl vêr partît autonomist che al à esprimût il Friûl, il Moviment Friûl.

Se il Friûl al fos la Catalogne …!
Ma il Friûl nol è la Catalogne. In Catalogne la linie indipendentiste e sarès lade ben di là dal 50%, impen che dome sfiliâlu, se no vessin votât ancje i tancj spagnûi imigrâts lenti e lenti residents par resons burocratichis e economichis, che ben si capìs che a àn difindude la opzion unitariste. Ancje in Friûl une votazion analighe no varès dât une risultance indipendentiste, no dome pai tancj imigrâts talians de aministrazion publiche che si son discjariâts chenti a bleon tai agns, ma parcè che i stes furlans no àn mai savût esprimi sieltis politichis diferentis di chês compatibilis cun chês imponudis di Rome. I furlans a son une nazionalitât stant che a son caraterizâts e diferenziâts pe lenghe che a fevelin. In altris timps e circostancis a varessin podût costituî une des tantis nazionalitâts europeanis  ricognossudis tâls cuntun stât propri indipendent o confederât. Ma no je lade cussì. A àn otignût une regjon autonome, speciâl dome in aparence, concedude tal 1947-48 plui par esaltâ la funzion nazionalistiche di Triest (che cul Friûl nol à nuie ce fâ ma che jal àn tacât intor!) che par ricognossi la specialitât dai furlans. Chescj a àn otignût il ricognossiment dal status di minorance linguistiche cuntune leç dome tal 1999, in gracie de lote di pôcs autonomiscj determinâts, daspò cincuante agns de promulgazion de Costituzion. Une leç, la 482/99, imbastide dut câs ae taliane vie, in mût che indi vignissin efiets pratics e istituzionâi tant misars di no rivâ a sei, no disìn suficients, ma nancje di indâsi di lôr.
Dal rest i furlans a àn bandonât a bleons la lôr lenghe discognossint di consecuence la lôr identitât. Contents lôr! A àn acetât che i politics di Pordenon e di Gurize (contraris a ogni forme di unitât dal Friûl storic) in cunvigne cun chei di Triest, si oponessin a Udin e a parassin indenant sot vie  la idee che chês dôs, par fortune ex provinciis, no sedin part dal Friûl. Cumò, compagn che daspò de vuere, si prospete di Rome la anession de regjon Friûl-VJ al Venit e intant si à argagnade une riforme eletorâl par indreçâ su Triest une cuote bocone di rapresentance in parlament a spesis dal Friûl. Indi sarès avonde par jevâ disdegn e riviel democratic di ducj i furlans. Tal 1966 il Moviment Friûl al nassè par dâ vôs al disdegn impiât de sielte di dineâ al Friûl une sede universitarie par no displasê a Triest. La rivendicazion inalore si slargjà a la cuistion furlane interie. Ma e fo une rivendicazion che e restà minoritarie. Al Moviment Friûl i furlans no derin la fuarce eletorâl che al veve bisugne par rifondâ la regjon, ridiscuti i podês di autonomie, separâ il teritori di une Triest parassitarie e ultranazionalistiche taliane dal Friûl storic. Nancje la propueste moderade, sot forme di leç costituzionâl (presentade e discutude in Consei regjonâl e riproponude ae Cjamare e al Senât dai parlamentârs dal Partît Radicâl, de Union Valdotaine, de SVP e di un sardist: “Istituzione della Ragione a statuto speciale Friuli e Trieste”) che al fasè il Moviment Friûl tai agns ’80, di tignî Triest te regjon ma cuntun rûl di citât metropolitane che no interferìs cu lis sieltis politichis dal Friûl, e ve risultance. Sul scomençâ dai agns ’90 l’Mf si ritirà in spiete par lassâ su la sene chei autonomiscj che tâi si definivin e che a declaravin di savê rapresentâ i interès dai furlans miôr di ce che al varès fat il partît autonomist storic. O vin viodût ce che a son stâts bogns di fâ e a ce pont che o sin rivâts. Pûr cence disponi de fuarce che e coventave par ribaltâ la siutazion, l’Mf al costituive pûr simpri un deterent cuintri de tentazion di Triest e di Rome di anulâ il Friûl. Cumò, in cundizions di degrât ben plui avanzât de cussience identitarie, a son chei che a proponin un referendum di separazion dal Friûl di Triest, ma a son ancje i stes che si son ben vuardâts di unîsi e ricostituî la fuarce dal Moviment Friûl (sul scomençâ dal 2000 une prime volte, tal 2013 la ultime) une volte palesât evident l’ingjan e il faliment di un autonomisim cence ‘la ortodossie politiche furlaniste’ dal Moviment Friûl. Cemût si puedial pensâ a un esit positîf dal referendum, che pal aspiet juridic al valarès pôc plui di un sondaç di opinion, cence vê sclarît ben a ducj che par Friûl si intint il Friûl storic, che al cjape Gurize, Pordenon, Puart e Sapade? Ma, plui di dut,  cemût si puedial pensâ di sostignî chel vôt in vie politiche  cence considerâ che al podarès rivoltâsi cuintri ce che al reste dal Friûl cul so esit falimentâr plui che probabil se no si ricostituìs une fuarce politiche tant che il Moviment Friûl, compagn che al sucedè tal 1966, in continuitât cun chel, cul so program di fonts? Fin che chei che si autodeclarin autonomiscj a fasin fente che nol sedi esistût il Moviment Friûl cul esorcizâlu vie e no declarin di volê tornâ a cjapâ sù il so program sot des sôs insegnis nol merete crodût ce che a proponin.
E intant e sta li pronte ancje la menace di assorbî il Friûl tal Trivenit.

Marco De Agostini, segretari politic del Mf
Adrian Cescje, president