MF e Petizione AIDLCM 1980-83
La Petizion AIDLCM volude e preparade in forme di propueste di leç de AIDLCM-Comitât pe Italie Nordorientâl e dal Moviment Friûl tal 1977, e je stade presentade in chel an cu la firme di un rapresentant de comunitât linguistiche furlane, Adrian Cescje di Nimis, di un de comunitât linguistiche slovene, Samo Pahor di Trst/Triest, e di un de comunitât linguistiche todescje, Max Pachner di Plodn/Sapade. Tal 1980 la AIDLCM cul supuart organizatîf e politic dal Moviment Friûl al forme un Comitât (Comitât pe tutele des minorancis linguistichis todescje, slovene e furlane de Italie nordorientâl) cun altris sociis e formazions par cjapâ sù sot di chê petizion 50.000 firmis su dut il teritori dal Friûl e a Triest. Ai 17 di Març dal 1982 une delegazion dal Comitât (Marco De Agostini pal Moviment Friûl, Samo Pahor pe AIDLCM, Elia Mioni par Democrazia Proletaria, Etelredo Pascolo par Int Furlane, Anita Sostero Bertoli par Scuele Furlane, Andrea De Vittor pe Clape Culturâl Aquilee e par In Uaite, Rem Spicemei par Vierte Furlane, Zorç Jus e Ane Jus pe Clape Culturâl Furlane Hermes di Colorêt, Federico Rossi par Radio Onde Furlane, Max Pachner pe Unione Sappadina,) vuidade di Adrian Cescje e presente ae presidente de Cjamare dai deputâts a Rome on. Nilde Jotti lis primis 35.000 firmis. L’an sucessîf, tal 1983, si consegnin altris firmis de petizion, in dut passe 51.000.
Te foto: Adrian Cescje al lei ae presidente Jotti la relazion dal Comitât inte sede di Montecitorio a Rome. Marco De Agostini, che te foto nol comparìs, al rapresente il Moviment Friûl come so segretari politic. Samo Pahor al rapresente come segretari la AIDLCM. A son presints al incuintri ancje i parlamentârs furlans Piergiorgio Bressani, Loris Fortuna e Arnaldo Baracetti.
