In date 29 di Avrîl 2017 cualchidun al è lât a regjistrâ simbul e denominazion dal Moviment Friûl al Ufici Brevets, cualchidun che nol è stât autorizât dai orghins responsabii dal Mf. O cognossìn il non e il cognon di chel cualchidun. Pal moment no lu disìn, ma e je za partide de bande nestre viers di lui une difide e i sarà fate denunzie penâl, parcè che l’at si configure come une vere robarie.
L’om al è un che al sta tes filis di chei che a pretindin di definîsi autonomiscj e furlaniscj, un dai tancj che in vincjecinc agns di assence dal Moviment des istituzions no son stâts bogns di unîsi intun front unitari pe cause che a disin di sostignî e che l’Mf al à servide dal 1966 al 1993, co si è ritirât.
No pensìn che la iniziative e sedi nassude tal cjâf di chel omenut. O pensìn che lu vedi ispirât cualchi regjist che al pretint di savê organizâ lui la politiche autonomiste furlane, ma che i darès fastidi se al tornàs a fâlu l’Mf. Lis mafiis politichis pes voris sporcjis a cjatin simpri cualchi manoâl che lis servìs.
O sin ae vilie di elezions regjonâls. La presince dal Mf e fâs pôre ancje a distance di 25 agns dal so ritîr, stant che cul Moviment in Consei regjonâl no si podarès menâ il mus pe glace. No savìn al moment se si presentaran lis cundizions par che il Moviment Friûl al presinti sôs listis e il so simbul ca di cualchi mês, ma o savìn dal sigûr che no saran chestis manovris a fermâlu se al sucedarà, e o savìn che no lassarìn che sal menin vie altris che no sedin chei che no àn mai molade la cause furlane dal 1966 incà, par lâ daûr a altris causis e interès.

In date 29.09.2017

Adrian Cescje, president                                                              Marc De Agostini, segretari

Si zontin chenti doi documents, chel che al dimostre la regjistrazions al Ufici dai Brevets (cul non dal regjistradôr taponât) e la difide fate par cont dal Mf.

Il simbul apocrif che a àn intindût di regjistrâ al è chest: